پاکستان کرکٹ ٹیم اپنے آئندہ دورہ ویسٹ انڈیز کے لیے 13 جولائی کو اسلام آباد سے روانہ ہوگی۔ اطلاعات کے مطابق، ہیڈ کوچ سرفراز احمد کی سربراہی میں قومی ٹیسٹ اسکواڈ کے کھلاڑی 8 جولائی کو اسلام آباد میں رپورٹ کریں گے، جہاں سے ٹیم 2 ٹیسٹ میچوں کی سیریز کھیلنے کے لیے ویسٹ انڈیز روانہ ہوگی۔ اس وقت قومی ریڈ بال کرکٹ ٹیم کا تربیتی کیمپ لاہور میں جاری ہے جس کے 2 جولائی کو ختم ہونے کا امکان ہے۔ ذرائع کا کہنا ہے کہ پاکستان کرکٹ بورڈ (پی سی بی) کی جانب سے دورہ ویسٹ انڈیز اور دورہ انگلینڈ دونوں کے لیے 17 ارکان پر مشتمل ایک ہی مشترکہ اسکواڈ کا اعلان کیے جانے کا قوی امکان ہے۔
شیڈول کے مطابق پاکستان کرکٹ ٹیم ویسٹ انڈیز کی سرزمین پر پہلا ٹیسٹ میچ 25 جولائی سے کھیلے گی جبکہ سیریز کا دوسرا اور آخری ٹیسٹ میچ 2 اگست سے شروع ہوگا۔ ویسٹ انڈیز کا دورہ مکمل کرنے کے بعد قومی ٹیم انگلینڈ روانہ ہوگی، جہاں پاکستان اور انگلینڈ کے درمیان 3 ٹیسٹ میچوں پر مشتمل اہم سیریز کا آغاز 19 اگست سے ہوگا۔
