پریس ریلیز
گجرات کے علاقے تھانہ دولت نگر میں مکیانہ چوک برسہ روڈ کے قریب پولیس کے ساتھ مبینہ مقابلے کے دوران بین الاضلاعی ڈکیت گینگ کا سرغنہ اپنے ہی ساتھیوں کی فائرنگ سے ہلاک جبکہ دو زخمی حالت میں گرفتار ہو گئے۔ پولیس ملزمان کو برآمدگی کے لیے لے جا رہی تھی کہ چار موٹر سائیکلوں پر سوار چھ مسلح ملزمان نے پولیس پارٹی پر اندھا دھند فائرنگ کر دی تاکہ اپنے ساتھیوں کو چھڑوا کر فرار ہو سکیں۔ حملہ آور ملزمان اپنے ساتھیوں کو چھڑوا کر فرار ہونے میں کامیاب ہو گئے، جن کی گرفتاری کے لیے پولیس کا سرچ آپریشن تاحال جاری ہے۔
فائرنگ کا سلسلہ رکنے کے بعد پولیس نے علاقے میں سرچ آپریشن شروع کیا جس کے دوران تین ملزمان کو زخمی حالت میں گرفتار کیا گیا۔ ابتدائی تحقیقات کے مطابق یہ زخمی ملزمان اپنے ہی ساتھیوں کی فائرنگ کا نشانہ بنے تھے، جن کی شناخت محمد منیر عرف مجنوں، شاہ نواز اور محمد ارشد سکنہ بہاولپور کے نام سے ہوئی ہے۔ تمام زخمیوں کو فوری طبی امداد کے لیے ہسپتال منتقل کیا گیا جہاں گینگ کا سرغنہ منیر عرف مجنوں زخموں کی تاب نہ لاتے ہوئے دم توڑ گیا۔ پولیس کے مطابق یہ ملزمان ڈکیتی، چوری اور رہزنی کی تین درجن سے زائد سنگین وارداتوں میں ملوث تھے۔
