ایران کے صدر مسعود پزشکیان نے کہا ہے کہ حالیہ جنگ کے دوران ہونے والی تباہی کے باوجود ایران اپنے انفراسٹرکچر کو پہلے سے بہتر بنا کر دوبارہ تعمیر کرے گا۔ اپنے بیان میں انہوں نے کہا کہ مسلط کی گئی ظالمانہ جنگ کو پندرہ دن ہو چکے ہیں لیکن اس کے باوجود ملک میں حالات معمول کے مطابق ہیں۔
ایرانی صدر کا کہنا تھا کہ مشکلات کے باوجود عوامی خدمات کی فراہمی میں کوئی بڑا تعطل پیدا نہیں ہوا اور حکومت عوام کے تعاون سے اس مشکل صورتحال سے بھی نکل آئے گی۔ انہوں نے کہا کہ ایرانی قوم نے ہمیشہ مشکل حالات میں ثابت قدمی دکھائی ہے اور اس بار بھی متحد ہو کر چیلنجز کا مقابلہ کر رہی ہے۔
دوسری جانب امریکی صدر ڈونلڈ ٹرمپ نے آبنائے ہرمز کے معاملے پر اپنے بیان میں کہا ہے کہ اس اہم سمندری راستے کو کھلا رکھنے کے لیے امریکا کے ساتھ کئی ممالک اپنے جنگی بحری جہاز بھیجیں گے۔ سوشل میڈیا پر جاری بیان میں انہوں نے امید ظاہر کی کہ چین، فرانس، جاپان، جنوبی کوریا، برطانیہ اور دیگر ممالک بھی اس اقدام میں شامل ہوں گے تاکہ عالمی تجارت اور توانائی کی ترسیل متاثر نہ ہو۔
عالمی سطح پر ایران اور امریکا کے درمیان جاری کشیدگی کے باعث خطے کی صورتحال بدستور توجہ کا مرکز بنی ہوئی ہے اور مختلف ممالک اس تنازع کے اثرات کو کم کرنے کے لیے سفارتی کوششیں بھی جاری رکھے ہوئے ہیں۔
