پاک فضائیہ نے مقامی طور پر تیار کردہ تیمور ویپن سسٹم کا کامیاب فلائٹ ٹیسٹ مکمل کر لیا ہے، جس کی نگرانی آئی ایس پی آر نے کی۔ تیمور ائیر لانچڈ کروز میزائل 600 کلومیٹر تک زمینی اور بحری اہداف کو نشانہ بنانے کی صلاحیت رکھتا ہے اور کم بلندی پر پرواز کرتے ہوئے دشمن کے ائیر اور میزائل ڈیفنس سسٹمز کو چکمہ دینے میں مؤثر ہے۔
تیمور میزائل جدید نیوی گیشن اور گائیڈنس سسٹم سے لیس ہے، جس کی بدولت یہ مقامی دفاعی صلاحیت میں اضافہ کرتا ہے اور پاکستان کے قابل اعتماد دفاع کو مضبوط بناتا ہے۔ فلائٹ ٹیسٹ کا مشاہدہ پاک افواج کے سینئر افسران اور سائنسدانوں نے کیا، جبکہ ائیر چیف مارشل ظہیر احمد بابر سدھو نے سائنسدانوں اور انجنیئرز کو مبارکباد دی۔
صدرِ مملکت نے بھی پاک فضائیہ کی اس کامیابی پر خراجِ تحسین پیش کرتے ہوئے کہا کہ مقامی سطح پر جدید ہتھیاروں کی تیاری قومی صلاحیت، عزم اور ادارہ جاتی مہارت کی عکاس ہے۔ انہوں نے کہا کہ یہ کامیابی دفاعی شعبے میں خود انحصاری کے سفر اور پاکستان کی سلامتی و خودمختاری کے تحفظ میں ایک اہم پیشرفت ہے۔
