محمد موسیٰ کی تاریخ ساز ڈبل ہیٹ ٹرک ، قائداعظم ٹرافی میں نایاب کارنامہ سرانجام

اسلام آباد ریجن کے فاسٹ بولر محمد موسیٰ نے قائداعظم ٹرافی 2025–26 میں شاندار کارکردگی دکھاتے ہوئے ڈبل ہیٹ ٹرک کر کے ایک تاریخی سنگِ میل عبور کر لیا۔ ڈائمنڈ کرکٹ گراؤنڈ اسلام آباد میں پشاور کے خلاف کھیلے گئے آخری راؤنڈ کے میچ میں محمد موسیٰ نے صرف چار گیندوں پر چار وکٹیں حاصل کرکے سب کو حیران کر دیا۔ یہ گزشتہ دس برسوں میں قائداعظم ٹرافی کی پہلی ڈبل ہیٹ ٹرک ہے، جو ان کی غیر معمولی مہارت اور جرات مندانہ بولنگ کا ثبوت ہے۔

محمد موسیٰ نے پشاور کے خلاف دوسری اننگز میں یہ کارنامہ انجام دیا، جبکہ اس سے قبل پہلی اننگز میں بھی وہ پانچ وکٹیں اپنے نام کر چکے تھے۔ ان کی تباہ کن بولنگ کی بدولت اسلام آباد نے پشاور کو اننگز اور 77 رنز سے شکست دیتے ہوئے ٹورنامنٹ کا اختتام شان دار انداز میں کیا۔

دوسری جانب سیالکوٹ اور کراچی بلو کی ٹیمیں پہلے ہی قائداعظم ٹرافی کے فائنل میں رسائی حاصل کر چکی ہیں، جہاں ٹرافی کے حصول کے لیے سخت مقابلہ متوقع ہے۔