وفاقی حکومت توشہ خانہ ایکٹ 2024 کے نفاذ کے ڈیڑھ سال گزرنے کے باوجود قواعد و ضوابط بنانے میں ناکام رہی ہے۔ سال 26-2025 کی آڈٹ رپورٹ میں انکشاف کیا گیا ہے کہ قواعد کی عدم موجودگی کی وجہ سے ایکٹ کی متعدد شقوں پر عمل درآمد ناممکن ہو گیا ہے، جو پارلیمنٹ سے منظور کیے گئے قانون کے بنیادی مقاصد کو بری طرح متاثر کر رہا ہے۔
رپورٹ کے مطابق، 5 نومبر 2025 کو کابینہ ڈویژن سے اس تاخیر پر وضاحت طلب کی گئی تھی، مگر متعلقہ حکام کی جانب سے تاحال کوئی جواب موصول نہیں ہوا۔ آڈٹ حکام نے سخت تشویش کا اظہار کرتے ہوئے سفارش کی ہے کہ شفافیت اور تحائف کے اندراج کے نظام کو فعال کرنے کے لیے فوری طور پر قواعد و ضوابط تیار کرکے ان کا باضابطہ نوٹیفکیشن جاری کیا جائے۔
