امریکا اور ایران کے درمیان بڑھتی ہوئی کشیدگی کے دوران پاکستان کا ثالثی کردار عالمی سطح پر مرکزِ نگاہ بن چکا ہے۔ ترک میڈیا ٹی آر ٹی کی حالیہ رپورٹ کے مطابق، پاکستان نے خطے میں ایک قابلِ اعتماد ثالث کے طور پر خود کو منوایا ہے، جس نے روایتی ہنگامہ خیزی کے برعکس خاموش، منظم اور مؤثر سفارت کاری کا راستہ اختیار کیا ہے۔ رپورٹ میں اس بات کو سراہا گیا ہے کہ آرمی چیف جنرل عاصم منیر کی قیادت میں پاکستان کی عسکری و انٹیلیجنس ساکھ، امریکا اور ایران دونوں سے متوازن روابط نے اسے ایک منفرد سفارتی حیثیت دی ہے۔ جنرل عاصم منیر کی بیک چینل ڈپلومیسی نے مشکل ترین حالات میں بھی فریقین کے مابین رابطوں کا تسلسل برقرار رکھا ہے۔ ترک میڈیا کا کہنا ہے کہ پاکستان کی عسکری قیادت سی پیک، علاقائی روابط اور متوازن خارجہ پالیسی کے ضامن کے طور پر ابھری ہے، جبکہ سعودی عرب کے ساتھ حالیہ دفاعی معاہدے نے بھی خطے میں پاکستان کی ساکھ کو مزید مضبوط کیا ہے۔ عالمی برادری کی جانب سے اس کردار کو سراہے جانے کے بعد پاکستان اب مشرقِ وسطیٰ میں ایک کلیدی سفارتی قوت کے طور پر تسلیم کیا جا رہا ہے، تاہم ماہرین کا ماننا ہے کہ اس اثر و رسوخ کو طویل مدت تک برقرار رکھنے کے لیے پاکستان کو درپیش معاشی چیلنجز پر قابو پانا لازمی ہوگا۔
