کھاریاں (قاری نصیر احمد کلیار) کھاریاں شہر کی خوبصورتی کو نکھارنے اور شہریوں کو سفری سہولیات فراہم کرنے کے پیشِ نظر ایک شاندار سماجی اقدام اٹھایا گیا ہے۔ آفتاب کرنسی ایکسچینج کی خصوصی مہم کے تحت جی ٹی روڈ کھاریاں پر نصب اسٹریٹ لائٹس کی مرمت اور بحالی کا کام تیزی سے جاری ہے، جس سے شہر کے اہم ترین راستوں کو دوبارہ روشن کیا جا رہا ہے۔
اس اہم اقدام کا بنیادی مقصد رات کے اوقات میں سڑکوں پر بہتر روشنی کا انتظام کرنا ہے، تاکہ شہریوں اور مسافروں کو محفوظ اور پرامن سفری ماحول مہیا کیا جا سکے۔ اسٹریٹ لائٹس کی بحالی سے نہ صرف حادثات اور جرائم کی روک تھام میں مدد ملے گی بلکہ کھاریاں شہر کے حسن اور رونق میں بھی خاطر خواہ اضافہ ہوگا۔
آفتاب کرنسی ایکسچینج کی جانب سے اس فلاحی اور عوامی خدمت کے جذبے کو مقامی شہریوں اور تاجر برادری نے دل کھول کر سراہا ہے۔ عوامی حلقوں کا کہنا ہے کہ نجی شعبے کی جانب سے شہر کی ترقی اور عوامی فلاح کے لیے ایسے اقدامات دیگر اداروں کے لیے بھی ایک بہترین مثال ہیں، اور انہوں نے اس کاوش کو انتہائی قابلِ تحسین قرار دیا ہے۔
