چیف آف آرمی سٹاف جنرل عاصم منیر نے واضح الفاظ میں اعادہ کیا ہے کہ ملک میں مکمل اور پائیدار امن و استحکام کے قیام تک دہشتگردی کے خلاف جنگ پورے قومی عزم کے ساتھ جاری رہے گی۔ پاک فوج کے شعبہ تعلقات عامہ (آئی ایس پی آر) کے مطابق، پاک فوج کے بہادر افسران اور جوانوں کو ان کی عسکری خدمات پر اعزازات سے نوازنے کے لیے جنرل ہیڈ کوارٹرز (جی ایچ کیو) راولپنڈی میں ایک پروقار تقریب منعقد ہوئی، جس کے مہمانِ خصوصی آرمی چیف جنرل عاصم منیر تھے۔
تقریب سے خطاب کرتے ہوئے آرمی چیف نے وطنِ عزیز کے دفاع کی خاطر اپنی جانیں قربان کرنے والے شہداء کے اہلِ خانہ کی ثابت قدمی، اعلیٰ وقار اور غیر متزلزل حوصلے کو زبردست خراجِ تحسین پیش کیا۔ انہوں نے شہداء کی بے مثال قربانیوں اور مٹی سے لازوال وابستگی کو سراہتے ہوئے کہا کہ شہداء اور غازی اس قوم کا لازوال فخر ہیں۔ شہداء کی عزت، تکریم اور ان کی قربانی ہر پاکستانی کے لیے ایک مقدس امانت ہے اور آج مادرِ وطن میں قائم امن و امان انہی پاک باز روحوں کی عظیم قربانیوں اور غیر متزلزل عزم کا مرہونِ منت ہے۔
آئی ایس پی آر کے مطابق، آرمی چیف جنرل عاصم منیر نے تقریب کے دوران دفاعِ وطن کے فرائض انجام دینے والے افسران، جوانوں اور شہداء کے غیور اہلِ خانہ کو عسکری اعزازات سے نوازا۔ مختلف آپریشنز میں غیر معمولی بہادری، شجاعت اور ملک و قوم کے لیے نمایاں ترین خدمات کے اعتراف میں افسران اور جوانوں کو 50 ستارۂ امتیاز (ملٹری) اور 12 تمغۂ بسالت عطا کیے گئے۔ تقریب کے اختتام پر آرمی چیف نے پاک فوج اور قانون نافذ کرنے والے تمام اداروں کی اعلیٰ آپریشنل تیاریوں اور ملک دشمن عناصر کے خلاف ان کے غیر متزلزل عزم کی دل کھول کر تعریف کی۔
