راولپنڈی: پاکستان اور آسٹریلیا کی کرکٹ ٹیموں کے درمیان تین ون ڈے میچوں کی سیریز کا پہلا مقابلہ آج راولپنڈی کرکٹ اسٹیڈیم میں کھیلا جائے گا۔ میچ کے لیے تمام تر تیاریاں مکمل کر لی گئی ہیں اور دونوں ٹیمیں میدان میں اترنے کے لیے پرعزم ہیں۔
ٹرافی کی رونمائی کی تقریب میں قومی ٹیم کے کپتان شاہین شاہ آفریدی اور آسٹریلوی کپتان جوش انگلس نے شرکت کی۔ گزشتہ روز دونوں ٹیموں نے اسٹیڈیم میں بھرپور پریکٹس سیشن میں حصہ لیا، جہاں پاکستانی بیٹرز نے پہلے فاسٹ بولرز اور بعد ازاں اسپنرز کے خلاف بیٹنگ کی مشقیں کیں۔ اس موقع پر ہیڈ کوچ مائیک ہیسن بھی کھلاڑیوں کو نیٹ سیشن کے دوران تکنیکی ہدایات دیتے رہے۔
پریس کانفرنس کے دوران کپتان شاہین شاہ آفریدی نے کہا کہ ہر کھلاڑی کو اپنی کارکردگی میں بہتری لانے پر توجہ دینی ہوگی۔ انہوں نے مزید کہا کہ ٹیم میں نوجوان کھلاڑیوں کو مواقع دینے کا مقصد مستقبل کے لیے مضبوط بنچ سٹرینتھ تیار کرنا ہے۔ دوسری جانب آسٹریلوی کپتان جوش انگلس نے پاکستان کو ایک مضبوط حریف قرار دیتے ہوئے کہا کہ انہیں کسی بھی صورت آسان نہیں لیا جا سکتا۔
میچ کا ٹاس شام 4 بجے ہوگا جبکہ مقابلے کا باقاعدہ آغاز شام ساڑھے 4 بجے ہوگا۔ کرکٹ شائقین اس اہم میچ کے لیے پرجوش ہیں۔
