امریکی صدر ڈونلڈ ٹرمپ نے خفیہ معلومات میڈیا میں لیک ہونے پر شدید برہمی کا اظہار کرتے ہوئے ذمہ دار شخص کی تلاش شروع کرنے کا اعلان کر دیا ہے۔ ان کا کہنا ہے کہ حکام اس فرد کو تلاش کر رہے ہیں جس نے ایک امریکی پائلٹ کی بازیابی کے بعد یہ معلومات میڈیا کو فراہم کیں کہ ایک دوسرا پائلٹ بھی ایران میں موجود ہے۔
ٹرمپ کے مطابق اس خبر کے منظر عام پر آنے سے قبل ایران کو دوسرے پائلٹ کی موجودگی کا علم نہیں تھا، تاہم رپورٹ شائع ہونے کے بعد امریکی ریسکیو آپریشن مزید پیچیدہ ہو گیا۔ انہوں نے کہا کہ اس لیک نے قومی سلامتی کے ایک حساس معاملے کو متاثر کیا ہے۔
امریکی صدر نے واضح کیا کہ متعلقہ میڈیا ادارے سے بھی اس معاملے پر وضاحت طلب کی جائے گی اور لیک کرنے والے کی شناخت فراہم کرنے کا مطالبہ کیا جائے گا۔ انہوں نے خبردار کیا کہ اگر معلومات فراہم نہ کی گئیں تو قانونی کارروائی عمل میں لائی جا سکتی ہے۔
ٹرمپ کا کہنا تھا کہ حکومت اس معاملے کو انتہائی سنجیدگی سے لے رہی ہے اور ذمہ دار عناصر کو ہر صورت بے نقاب کیا جائے گا تاکہ آئندہ ایسے واقعات سے بچا جا سکے۔
