واشنگٹن: صدر ٹرمپ کی وزیراعظم شہباز شریف سے غیر معمولی گرمجوشی

واشنگٹن: امریکی صدر ڈونلڈ ٹرمپ نے غزہ پیس بورڈ کے پہلے اجلاس کے موقع پر وزیر اعظم شہباز شریف سے ملاقات کے دوران غیر معمولی گرمجوشی کا مظاہرہ کیا اور انہیں گلے لگا لیا۔ یہ منظر اجلاس میں موجود عالمی رہنماؤں اور سفارتی حلقوں کی توجہ کا مرکز بن گیا۔
صدر ٹرمپ نے اجلاس کے اختتام پر وزیراعظم شہباز شریف سے غیر رسمی گفتگو بھی کی اور انہیں خراج تحسین پیش کیا۔ صدر ٹرمپ نے پاکستان کی تعریف کرتے ہوئے کہا کہ وہ وزیراعظم شہباز شریف کو پسند کرتے ہیں اور پاکستان کے فیلڈ مارشل عاصم منیر کو بھی سراہا، جنہیں وہ ٹف اور اچھے فائٹر سمجھتے ہیں۔

امریکی صدر نے پاک بھارت جنگ کا ذکر کرتے ہوئے کہا کہ اس دوران دونوں ملکوں میں شدید جنگی صورتحال تھی اور 11 طیارے مار گرائے گئے۔ انہوں نے بتایا کہ امریکا نے اپنا کردار ادا کرتے ہوئے جنگ روکائی اور واضح کیا کہ اگر لڑائی جاری رہی تو دو سو فیصد ٹیرف عائد کیے جائیں گے اور تجارتی معاہدے نہیں ہوں گے، جس کے بعد دونوں ملکوں نے لڑائی بند کر دی۔
صدر ٹرمپ نے کہا کہ جنگ کے دوران وزیراعظم شہباز شریف سے قریبی تعلقات قائم ہوئے، جن کی بروقت اقدامات سے 25 ملین زندگیوں کی حفاظت ممکن ہوئی، جبکہ حقیقت میں یہ تعداد اس سے بھی زیادہ ہو سکتی تھی۔