پاکستان نے انڈر 19 ایشیا کپ کرکٹ میں شاندار کارکردگی کا مظاہرہ کرتے ہوئے متحدہ عرب امارات کو 70 رنز سے شکست دے کر سیمی فائنل کے لیے کوالیفائی کر لیا۔
گروپ کے آخری میچ میں پاکستان نے پہلے بیٹنگ کرتے ہوئے مقررہ اوورز میں 9 وکٹوں کے نقصان پر 241 رنز بنائے۔
پاکستان کی جانب سے احمد حسین نے 65 رنز کی عمدہ اننگز کھیلی، سمیر منہاس نے 44 جبکہ حمزہ ظہور نے 42 رنز اسکور کیے۔
یو اے ای کی جانب سے یوگ شرما نے 3 اور نسیم خان نے 2 کھلاڑیوں کو آؤٹ کیا۔
242 رنز کے ہدف کے تعاقب میں یو اے ای کی ٹیم 38ویں اوور میں 171 رنز پر ڈھیر ہو گئی۔
یو اے ای کے ایان مصباح نے 77 رنز کی مزاحمتی اننگز کھیلی جبکہ پرتھوی مدھو 27 رنز بنا سکے۔
پاکستان کی جانب سے عبدالسبحان نے شاندار بولنگ کرتے ہوئے 4 وکٹیں حاصل کیں۔
اس کامیابی کے ساتھ پاکستان نے انڈر 19 ایشیا کپ کے سیمی فائنل کے لیے کوالیفائی کر لیا ہے۔
