راولپنڈی: چیئرمین پاکستان تحریک انصاف بیرسٹر گوہر نے اڈیالہ جیل کے قریب میڈیا سے گفتگو کرتے ہوئے کہا کہ کشمیر پاکستان کی شہ رگ ہے، اور یہ لاہور یا کشمور نہیں بنے گا۔ انہوں نے مزید کہا کہ جب ہم نے آزاد کشمیر کے الیکشن کا بائیکاٹ کیا تھا تو اس وقت بھی یہی کہا تھا کہ پہلے سازگار ماحول بنایا جائے، کیونکہ فری اینڈ فیئر الیکشن کے انعقاد سے ہی ملک آگے ترقی کی راہ پر گامزن ہو سکتا ہے۔ ان کا کہنا تھا کہ دونوں بڑی سیاسی جماعتوں نے اپنی سیاست چمکاتے ہوئے حالات کو اس نہج تک پہنچایا ہے، اس لیے موجودہ ملکی صورتحال میں سیاست اور پوائنٹ اسکورنگ سے گریز کیا جانا چاہیے۔
بیرسٹر گوہر نے گفتگو جاری رکھتے ہوئے بتایا کہ نورین بی بی کے خلاف مقدمہ درج کیا گیا ہے، لیکن اس طرح کے پرچے درج کرنے سے حالات بہتر ہونے کے بجائے مزید خراب ہوتے ہیں، جبکہ نورین نیازی نے جو کچھ بھی کہا وہ ان کا ذاتی بیان تھا جس کی وہ وضاحت بھی کر چکے ہیں۔ چیئرمین پی ٹی آئی نے اس بات پر زور دیا کہ ملک میں جاری بحرانوں کے حل اور بہتری کی واحد کنجی بانی پی ٹی آئی سے ملاقات میں پوشیدہ ہے۔
