وزیر اعلیٰ پنجاب مریم نواز نے صوبے میں شدید بارشوں کی بروقت پیش گوئی کے لیے ارلی وارننگ سسٹم کو فوری طور پر فعال کرنے کا حکم جاری کرتے ہوئے ممکنہ سیلاب سے نمٹنے کے لیے تمام تیاریاں مکمل کرنے کی ہدایت کر دی ہے۔ ایک اہم اجلاس کی صدارت کرتے ہوئے ان کا کہنا تھا کہ پوٹوہار ریجن سمیت پنجاب کے مختلف شہروں میں معمول سے زیادہ بارشوں کی پیش گوئی کی گئی ہے، جس کے پیشِ نظر مون سون کے حوالے سے تمام پیشگی اقدامات اٹھائے جا رہے ہیں۔ انہوں نے واضح کیا کہ کسی بھی قسم کی سیلابی صورتحال اور ہنگامی حالات سے نمٹنے کے لیے صوبے کے تمام متعلقہ ادارے مکمل طور پر متحرک اور ہائی الرٹ ہیں۔
اجلاس کے دوران وزیر اعلیٰ پنجاب نے بارشوں کے اس سیزن میں بچوں کی حفاظت کو یقینی بنانے کے لیے والدین سے بھی اپنا کلیدی کردار ادا کرنے کی اپیل کی۔ مریم نواز نے والدین کو تاکید کی کہ وہ بچوں کو بارش کے دوران زیادہ پانی والی جگہوں پر جانے سے سختی سے روکیں، اور انہیں اکیلے باہر یا ایسی جگہوں پر ہرگز نہ بھیجیں جہاں مکانات کی چھتیں کمزور یا بوسیدہ ہوں، تاکہ کسی بھی امکانی حادثے یا جانی نقصان سے بچا جا سکے۔
