پاکستان تحریک انصاف (پی ٹی آئی) نے آزادکشمیر میں ہونے والے آئندہ انتخابات کے مکمل بائیکاٹ کا باضابطہ اعلان کر دیا ہے۔ پارٹی کی جانب سے جاری کردہ ایک اہم اعلامیے میں واضح کیا گیا ہے کہ موجودہ ملکی اور علاقائی حالات کے پیش نظر تحریک انصاف اس انتخابی عمل کا حصہ نہیں بنے گی، اور یہ فیصلہ کسی بھی قسم کے سیاسی فائدے یا نقصان کو مدنظر رکھ کر نہیں کیا گیا۔
ترجمان کے مطابق یہ اصولی فیصلہ کشمیری عوام کے ساتھ یکجہتی کا اظہار کرنے اور جمہوری اقدار کے احترام کو برقرار رکھنے کے لیے کیا گیا ہے، اور جب تک کشمیری عوام کے لیے ایک آزاد، منصفانہ، شفاف اور پُرامن سیاسی ماحول میسر نہیں آتا، تب تک پاکستان تحریک انصاف ایسے کسی بھی انتخابی عمل سے دور رہے گی۔ اعلامیے میں مزید کہا گیا ہے کہ آزادکشمیر اس وقت شدید ترین بحران کی زد میں ہے، جہاں راولاکوٹ سمیت مختلف علاقوں میں ہزاروں شہری اپنے جائز حقوق اور مطالبات کی منظوری کے لیے طویل عرصے سے دھرنے دیے بیٹھے ہیں۔
تحریک انصاف نے صورتحال کی سنگینی پر تشویش کا اظہار کرتے ہوئے بتایا کہ پنجاب سے آزادکشمیر کی طرف اشیائے خورونوش کی ترسیل بھی مکمل طور پر بند ہو چکی ہے، جس سے مقامی آبادی شدید مشکلات کا شکار ہے۔ پارٹی کا مؤقف ہے کہ ایسی نازک صورتحال میں کشمیری عوام کو مزید سیاسی عدم استحکام اور انتشار کی طرف دھکیلنے کے بجائے، حکومت کو چاہیے کہ وہ ان کے بنیادی مسائل اور جائز مطالبات کا فوری اور پائیدار حل تلاش کرے۔
