کھاریاں (رپورٹ: قاری نصیر احمد کلیار) وزیرِ اعلیٰ پنجاب کے خصوصی ویژن کے تحت تحصیل ہیڈ کوارٹر (ٹی ایچ کیو) ہسپتال کھاریاں میں لگایا گیا فری سکریننگ کیمپ اپنے تمام تر اہداف کامیابی سے حاصل کرنے کے بعد اختتام پذیر ہو گیا ہے۔ کیمپ کے آخری روز بھی تحصیل کھاریاں کے طول و عرض اور دور دراز علاقوں سے آئے ہوئے ہزاروں مرد، خواتین اور بزرگ مریضوں کا مختلف شعبہ جات کے ماہر اور اسپیشلسٹ ڈاکٹرز نے تفصیلی معائنہ کیا۔ ہسپتال انتظامیہ کی جانب سے کیمپ میں آنے والے تمام مریضوں کو نہ صرف مفت طبی مشورے دیے گئے بلکہ ان کے ضروری ابتدائی ٹیسٹ، تشخیصی مراحل اور ادویات کی فراہمی بھی مکمل طور پر مفت یقینی بنائی گئی۔
ہسپتال انتظامیہ کے مطابق، اس سکریننگ کیمپ کے انعقاد کا بنیادی مقصد غریب اور متوسط طبقے سے تعلق رکھنے والے عوام کو ان کی دہلیز پر معیاری اور مہنگی طبی سہولیات بالکل مفت فراہم کرنا اور خطرناک و پیچیدہ بیماریوں کی بروقت تشخیص کو ممکن بنانا تھا۔ کیمپ کے دوران تحصیل کھاریاں کے شہریوں کی جانب سے غیر معمولی جوش و خروش دیکھا گیا، جنہوں نے بڑی تعداد میں آ کر اپنی رجسٹریشن کروائی اور نامور معالجین سے اپنی صحت کے حوالے سے تفصیلی رہنمائی حاصل کی۔
ٹی ایچ کیو ہسپتال کھاریاں کے میڈیکل سپرنٹینڈنٹ (ایم ایس) ڈاکٹر ظفر مہدی نے کیمپ کی کامیابی پر گفتگو کرتے ہوئے کہا کہ بیماریوں کی بروقت تشخیص سے نہ صرف قیمتی انسانی جانوں کو بچانے اور پیچیدگیوں پر قابو پانے میں مدد ملتی ہے، بلکہ اس طرح کے کیمپس سے عوام میں صحت و صفائی کے حوالے سے شعور اور آگاہی بھی پیدا ہوتی ہے۔ دوسری جانب کھاریاں کے شہریوں، سول سوسائٹی کے عہدیداران اور مستفید ہونے والے مریضوں نے پنجاب حکومت اور ہسپتال انتظامیہ کے اس عوامی دوست اقدام کو دل کھول کر سراہا اور مطالبہ کیا کہ غریب پرور مہم کے تحت ایسے فری میڈیکل کیمپس مستقبل میں بھی تسلسل کے ساتھ جاری رکھے جائیں۔
