واشنگٹن، مارکو روبیو کی وزیراعظم شہباز شریف اور اسحاق ڈار سے ملاقات

مارکو روبیو نے شہباز شریف اور اسحاق ڈار سے واشنگٹن ڈی سی میں اہم ملاقات کی، جس میں دوطرفہ تعلقات اور خطے کی صورتحال پر تبادلہ خیال کیا گیا۔ ملاقات کے بعد امریکی وزیر خارجہ نے سوشل میڈیا پر تصویر شیئر کرتے ہوئے بتایا کہ بات چیت کے دوران اسٹریٹجک تعلقات، کریٹیکل منرلز، ترقیاتی تعاون اور انسداد دہشتگردی سمیت اہم امور زیر بحث آئے۔

مارکو روبیو نے اپنے پیغام میں کہا کہ وہ امریکی صدر کی جانب سے غزہ امن منصوبے میں پاکستان کے تعمیری کردار اور بورڈ آف پیس میں شمولیت کو سراہتے ہیں۔ انہوں نے اس امید کا اظہار بھی کیا کہ دونوں ممالک کے درمیان تعاون کو مزید وسعت دی جائے گی تاکہ باہمی مفادات اور علاقائی استحکام کو فروغ مل سکے۔
یہ ملاقات ایسے وقت میں ہوئی ہے جب پاکستان اور امریکا کے تعلقات میں نئے امکانات پر غور کیا جا رہا ہے اور مختلف شعبوں میں شراکت داری کو مضبوط بنانے کی کوششیں جاری ہیں۔