برسلز/پیرس (عالمی ڈیسک)غزہ میں جاری انسانی المیے پر عالمی ردعمل بڑھنے لگا ہے۔ برطانیہ، فرانس سمیت 27 یورپی ممالک کے وزرائے خارجہ نے مشترکہ بیان جاری کرتے ہوئے اسرائیل سے مطالبہ کیا ہے کہ بین الاقوامی اداروں کو غزہ کے تمام علاقوں تک بلارکاوٹ اور محفوظ امداد کی رسائی دی جائے۔
"غزہ میں قحط ہماری آنکھوں کے سامنے مسلط کیا جا رہا ہے”
یورپی وزرا کے بیان میں کہا گیا ہے کہ غزہ میں انسانی بحران ناقابل تصور حدوں کو چھو رہا ہے اور موجودہ حالات میں ہر گھنٹہ قیمتی انسانی جانوں کے ضیاع کا باعث بن رہا ہے۔
بیان میں خبردار کیا گیا کہ:
"ہماری آنکھوں کے سامنے غزہ میں قحط زبردستی مسلط کیا جا رہا ہے، اسرائیل بین الاقوامی امداد کے داخلے میں فوری طور پر رکاوٹیں ختم کرے۔”
🛑 امدادی مراکز پر مہلک حملے ناقابلِ قبول
یورپی ممالک نے اسرائیل پر امدادی مراکز پر مہلک کارروائیاں بند کرنے کا بھی زور دیا اور کہا کہ اسرائیل شہریوں اور امدادی کارکنوں کی تحفظ کو یقینی بنانے کے لیے فوری، عملی اقدامات کرے۔
غزہ: ایک اور خونی دن
غزہ پر اسرائیلی فوج کے وحشیانہ حملے جاری ہیں۔
- صرف آج صبح سے اب تک 60 سے زائد فلسطینی شہید ہو چکے ہیں۔
- غذائی قلت اور بھوک کی شدت سے آج مزید 2 بچوں سمیت 5 فلسطینی جاں بحق ہوئے، جس کے بعد قحط سے مرنے والوں کی تعداد 227 تک پہنچ چکی ہے، جن میں 103 بچے شامل ہیں۔
🌐 عالمی اداروں پر زور
بیان میں عالمی برادری سے بھی اپیل کی گئی ہے کہ وہ اقوام متحدہ اور امدادی اداروں کو مکمل معاونت فراہم کریں تاکہ محصور غزہ کے عوام تک خوراک، دوا اور بنیادی ضروریات کی بروقت فراہمی ممکن ہو سکے۔
