وائٹ ہاؤس کے ٹیلی پرامپٹر آپریٹر گیبریل پیریز پر صدر ڈونلڈ ٹرمپ کی تقاریر سے مبینہ طور پر مالی فائدہ اٹھانے کا انکشاف ہوا ہے۔ الزامات کے مطابق، پیریز تقریر کے متن تک رسائی کا ناجائز فائدہ اٹھاتے ہوئے اہم الفاظ اور نکات پر آن لائن بیٹنگ ایپس کے ذریعے شرطیں لگاتے تھے، جس سے انہوں نے تقریباً ایک لاکھ ڈالر کمائے۔ مشکوک سرگرمی سامنے آنے پر متعلقہ پریڈکشن مارکیٹ پلیٹ فارم نے ان کا اکاؤنٹ منجمد کر کے معاملہ ریگولیٹری حکام کے سپرد کر دیا ہے۔
وائٹ ہاؤس کی ترجمان کیرولین لیویٹ نے تصدیق کی ہے کہ صدر ٹرمپ کو اس معاملے سے باخبر کر دیا گیا ہے، جس کے بعد ملزم کو فوری طور پر معطل کر کے بغیر تنخواہ رخصت پر بھیج دیا گیا ہے۔ فی الحال گیبریل پیریز وائٹ ہاؤس میں اپنے فرائض سر انجام نہیں دے رہے اور انتظامیہ کی جانب سے اس سنگین خلاف ورزی پر مزید تحقیقات کی جا رہی ہیں۔
