کھاریاں (قاری نصیر احمد کلیار) ڈسٹرکٹ اینڈ سیشن جج گجرات نے سرائے عالمگیر کا دورہ کیا، جہاں انہوں نے وکلاء برادری کی سہولت کے لیے تعمیر کی گئی نئی بار بلڈنگ کا باقاعدہ افتتاح کیا۔ اس اہم موقع پر سرائے عالمگیر بار کے عہدیداران، سینئر وکلاء اور وکلاء برادری کی ایک بڑی تعداد موجود تھی، جنہوں نے اس نئی عمارت کی تکمیل کو عدالتی امور کی بہتری کے لیے ایک خوش آئند قدم قرار دیا۔
تقریب کے دوران بار اور بینچ کے باہمی تعاون کو مزید مستحکم کرنے کے حوالے سے تبادلہ خیال کیا گیا۔ ڈسٹرکٹ اینڈ سیشن جج نے اس عزم کا اظہار کیا کہ جدید سہولیات سے آراستہ یہ نئی بلڈنگ انصاف کی مؤثر اور تیز تر فراہمی میں کلیدی کردار ادا کرے گی۔ اس موقع پر قانونی شعبے کی بہتری اور وکلاء کو درپیش مسائل کے حل کے لیے مختلف امور پر بھی گفتگو کی گئی۔
