پنجاب اسمبلی میں 16 سال سے کم عمر بچوں کی سوشل میڈیا تک رسائی کو محدود کرنے کے لیے ایک اہم قرارداد جمع کروا دی گئی ہے۔ یہ قرارداد چائلڈ پروٹیکشن اینڈ ویلفیئر بیورو پنجاب کی چیئرپرسن اور ایم پی اے سارہ احمد کی جانب سے پیش کی گئی ہے، جس کا بنیادی مقصد بچوں کو سائبر بُلنگ، آن لائن استحصال، غیر اخلاقی مواد اور سوشل میڈیا کے دیگر مضر اثرات سے تحفظ فراہم کرنا ہے۔
قرارداد میں حکومت سے مطالبہ کیا گیا ہے کہ وہ عمر کی تصدیق کا ایک مؤثر نظام متعارف کرائے اور ایسے قانونی اقدامات اٹھائے جن کے ذریعے بچوں کے سوشل میڈیا اکاؤنٹس کے استعمال پر قدغن لگائی جا سکے۔ واضح رہے کہ عالمی سطح پر آسٹریلیا، فرانس، چین اور امریکا جیسے ممالک پہلے ہی اس ضمن میں قوانین لاگو کر چکے ہیں، اور اب پنجاب میں بھی بچوں کی ڈیجیٹل حفاظت کے لیے اسی طرز پر قانون سازی پر غور کیا جا رہا ہے۔
