ایران کے سپریم لیڈر مجتبیٰ خامنہ ای نے اپنے ایک حالیہ تحریری بیان میں عزم ظاہر کیا ہے کہ شہید رہنما سید علی خامنہ ای اور حالیہ جنگ میں شہید ہونے والے تمام افراد کے خون کا بدلہ ہر صورت لیا جائے گا۔ ایرانی میڈیا کے مطابق، سپریم لیڈر کا کہنا تھا کہ ایران اپنے شہید قائدین کے نقشِ قدم اور راستے پر پوری ثابت قدمی کے ساتھ گامزن رہے گا۔ انہوں نے واضح کیا کہ تمام شہدا کے خون کا انتقام ایرانی قوم کی دلی خواہش ہے، جو کہ ہر صورت پوری ہو کر رہے گی اور اس مشن سے کسی بھی صورت پیچھے نہیں ہٹا جائے گا۔
مجتبیٰ خامنہ ای نے اپنے بیان میں اسرائیل اور اس کے اتحادیوں کو سخت انتباہ جاری کرتے ہوئے کہا کہ ان جرائم کے ذمہ دار افراد کی مکمل نشاندہی کی جا چکی ہے، اور وہ اپنے ساتھ اپنی قبروں تک پرسکون موت مرنے کی نامکمل خواہش لے کر جائیں گے۔ انہوں نے مزید کہا کہ ہم دنیا میں رہیں یا نہ رہیں، یہ وعدہ ہر حال میں پورا ہوگا اور بہت جلد دنیا بھر کے تمام آزاد انسان اس عظیم مشن کی تکمیل میں اپنا اپنا بھرپور کردار ادا کرتے ہوئے نظر آئیں گے۔
