برطانیہ اور ترکیے نے نیٹو سربراہی اجلاس کے موقع پر ایک نئے جامع سکیورٹی اور دفاعی شراکت داری معاہدے پر دستخط کر دیے ہیں، جسے دونوں ممالک کے مضبوط اسٹریٹجک تعلقات میں ایک انتہائی اہم سنگ میل قرار دیا جا رہا ہے۔ غیر ملکی میڈیا رپورٹس کے مطابق دونوں ممالک کی جانب سے جاری کردہ مشترکہ اعلامیے میں کہا گیا ہے کہ یہ شراکت داری یورو اٹلانٹک خطے میں تیزی سے بدلتی ہوئی سکیورٹی صورتحال کے پیش نظر دونوں یورپی نیٹو اتحادیوں کے درمیان تعاون کو مزید مضبوط اور وسیع بنانے کے غیر متزلزل عزم کی عکاسی کرتی ہے۔
اس نئے معاہدے کے تحت برطانیہ اور ترکیے سکیورٹی اور دفاعی پالیسی کے سیاسی و عسکری پہلوؤں پر نئے جدید مشاورتی نظام قائم کریں گے، جبکہ تعاون کے اہم شعبوں میں مشترکہ دفاعی حکمت عملی، عسکری تعاون، دفاعی صنعت اور جدید ٹیکنالوجی کا تبادلہ، سائبر سکیورٹی اور ہائبرڈ خطرات سے نمٹنا شامل ہیں۔ اعلامیے میں مزید واضح کیا گیا کہ برطانیہ اور ترکیے یورو اٹلانٹک سکیورٹی میں ایک منفرد اور ناگزیر کردار ادا کر رہے ہیں اور دونوں ممالک نے نیٹو اتحاد کے اندر اپنی مشترکہ ذمہ داریوں کو مزید مؤثر انداز میں نبھانے، دفاعی اخراجات میں اضافہ کرنے اور اتحاد کو درکار دفاعی صلاحیتوں کی فراہمی کے لیے باہمی تعاون کو بلند ترین سطح پر لے جانے کے عزم کا اعادہ کیا ہے۔
