ڈیلاس کے فٹبال اسٹیڈیم میں کھیلے گئے فیفا ورلڈکپ کے سنسنی خیز پری کوارٹر فائنل میچ میں اسپین نے پرتگال کو صفر کے مقابلے میں ایک گول سے شکست دے کر ٹورنامنٹ سے باہر کر دیا ہے، جس کے ساتھ ہی پرتگال کے مایہ ناز اور عمر رسیدہ فٹبالر کرسٹیانو رونالڈو کا ورلڈکپ جیتنے کا خواب ایک بار پھر ادھورا رہ گیا اور وہ گزشتہ ایڈیشن کی طرح اس بار بھی نم آنکھوں کے ساتھ خالی ہاتھ میدان سے لوٹے۔ میچ کے دوران اسپین نے نسبتاً بہتر اور جارحانہ کھیل کا مظاہرہ کرتے ہوئے پرتگال کے 10 حملوں کے مقابلے میں 15 حملے کیے، جہاں ایک طرف اسپین کے نوجوان اسٹار لمین یامال نے پرتگالی دفاع میں کئی شگاف ڈالے اور بہترین پاسز دیے لیکن بدقسمتی سے وہ گول میں تبدیل نہ ہو سکے، جس کے باعث پہلا اور دوسرا ہاف مقررہ وقت تک بغیر کسی گول کے برابر رہا۔ کھیل کے انجری ٹائم کے پہلے ہی منٹ میں اسپینش ٹیم نے ایک بہترین موو بنائی جس پر میکائیل میرینو نے شاندار گول کر کے ٹیم کو سبقت دلائی جو میچ کے اختتام تک برقرار رہی، اور اس تاریخی جیت کے ساتھ ہی اسپین نے کوارٹر فائنل میں جگہ پکی کر لی ہے جہاں اب اس کا مقابلہ بیلجئم یا امریکا میں سے کسی ایک ٹیم سے ہوگا۔
