امریکی فضائیہ نے آبنائے ہرمز کے گرد جاری ناکہ بندی کی خلاف ورزی کرنے پر بحیرہ عمان میں ایک بھارتی آئل ٹینکر پر میزائل حملہ کر کے اسے ناکارہ بنا دیا ہے جس کے نتیجے میں جہاز پر سوار عملے کے تین بھارتی ارکان ہلاک ہو گئے ہیں۔ امریکی فوج کی سینٹرل کمانڈ (سینٹکام) نے اس کارروائی کی باقاعدہ تصدیق کرتے ہوئے موقف اختیار کیا ہے کہ امریکی جنگی طیارے نے آئل ٹینکر کے انجن روم کو اس وقت نشانہ بنایا جب جہاز کا عملہ امریکی فورسز کی جانب سے دی جانے والی بار بار کی ہدایات اور وارننگز کو نظرانداز کرتے ہوئے آگے بڑھتا رہا۔ بھارتی میڈیا کے مطابق اس بدقسمت جہاز پر عملے کے کل 28 افراد سوار تھے جن میں سے 24 کا تعلق بھارت سے تھا اور حملے کے بعد لاپتہ ہونے والے 3 بھارتی شہریوں کی اب موت کی تصدیق ہو چکی ہے، جب کہ دوسری جانب اس سنگین واقعے پر شدید ردعمل دیتے ہوئے حکومتِ بھارت نے نئی دہلی میں تعینات امریکی مشن کے نائب سربراہ کو فوری طور پر وزارتِ خارجہ طلب کر کے اس فضائی حملے اور جانی نقصان پر اپنا سخت ترین باضابطہ سفارتی احتجاج ریکارڈ کروایا ہے۔
