ایرانی سپریم لیڈر کے مشیر محسن رضائی نے امریکی پالیسیوں پر سخت تنقید کرتے ہوئے کہا ہے کہ ڈونلڈ ٹرمپ ایران پر مسلسل یہ دباؤ ڈال رہے ہیں کہ ان کی شرائط کو تسلیم کیا جائے، جبکہ وہ خود اپنی شرائط کو جان بوجھ کر مبہم رکھ رہے ہیں۔ محسن رضائی نے واضح کیا کہ اس وقت سامنے آنے والے موجودہ مسودے میں کئی ایسے ابہام موجود ہیں جن کی وضاحت کا ہونا انتہائی ضروری ہے اور ایران کسی بھی ایسے مبہم فارمولے کو قبول نہیں کرے گا۔
دوسری جانب، انقلابِ ایران کے بانی آیت اللّٰہ روح اللّٰہ خمینی کی 37 ویں برسی کے موقع پر اپنے ایک خصوصی پیغام میں مجتبیٰ خامنہ ای نے دشمن کے عزائم کو بے نقاب کرتے ہوئے کہا کہ دشمن کو مختلف میدانوں میں شکست کا سامنا کرنا پڑا ہے، جس کے بعد اب وہ ایرانی عوام کی استقامت اور حوصلوں کو کمزور کرنے کی سازشیں کر رہا ہے۔ انہوں نے تاکید کی کہ قوم کو اس وقت پہلے سے زیادہ بیدار اور متحد رہنے کی ضرورت ہے تاکہ دشمن کے ان تمام منفی ہتھکنڈوں کو ناکام بنایا جا سکے۔
