اسرائیلی وزیر اعظم بنجمن نیتن یاہو نے مغربی کنارے میں ایک نیوز کانفرنس سے خطاب کرتے ہوئے اسرائیلی فوج کو غزہ کی پٹی کے مزید حصوں پر قبضہ کرنے کی سخت ہدایت جاری کر دی ہیں۔ نیتن یاہو نے واضح کیا کہ پہلے 50 فیصد اور پھر 60 فیصد قبضے کے بعد اب فوج کو غزہ کی 70 فیصد زمین پر اپنا کنٹرول قائم کرنے کا حکم دیا گیا ہے۔ یہ اقدام ایسے وقت میں سامنے آیا ہے جب پہلے ہی اکتوبر 2023 سے جاری جنگ کے نتیجے میں غزہ کی بیشتر آبادی ایک محدود ساحلی پٹی تک سمٹ کر رہ گئی ہے۔ اعداد و شمار کے مطابق، اسرائیل پہلے ہی غزہ کے تقریباً 64 فیصد حصے پر مؤثر کنٹرول رکھتا ہے، اور اب حالیہ احکامات اس جارحیت کو مزید وسعت دینے کی جانب ایک اہم پیش رفت ہیں۔ یاد رہے کہ اکتوبر میں امریکا کی ثالثی میں ہونے والی عارضی جنگ بندی بھی اسرائیلی حملوں کو روکنے یا کسی مستقل حل تک پہنچنے میں ناکام رہی تھی، جس کے بعد سے صورتحال مزید سنگین ہوتی جا رہی ہے۔
