عید الاضحیٰ کے موقع پر پنجاب بھر میں صفائی ستھرائی کے لیے ایک جدید اور مثالی آپریشن جاری ہے۔ صوبائی تاریخ میں پہلی بار صفائی کے عمل کی نگرانی اور انتظام کے لیے ڈرون ٹیکنالوجی کا استعمال کیا جا رہا ہے، جس سے عملے کو کارکردگی بہتر بنانے میں مدد مل رہی ہے۔
‘ستھرا پنجاب’ کے ترجمان کے مطابق عید کے پہلے دو دنوں کے دوران پنجاب بھر سے 1 لاکھ 10 ہزار ٹن سے زائد آلائشیں اور قربانی کی باقیات کو کامیابی سے ٹھکانے لگا دیا گیا ہے۔ اس بڑے آپریشن میں صرف لاہور شہر سے 17 ہزار ٹن سے زائد آلائشیں اٹھائی گئیں۔
صوبائی وزیر اطلاعات عظمیٰ بخاریٰ نے میڈیا سے گفتگو کرتے ہوئے بتایا کہ وزیراعلیٰ پنجاب مریم نواز خود اس پورے آپریشن کی مانیٹرنگ کر رہی ہیں۔ انہوں نے مزید کہا کہ ستھرا پنجاب کی ٹیمیں دیہات سے لے کر شہروں تک ہمہ وقت فیلڈ میں موجود ہیں اور ایک لاکھ 84 ہزار سے زائد ورکرز اس مشن میں مصروفِ عمل ہیں۔
حکام کے مطابق آلائشوں کو بروقت ٹھکانے لگانے کے بعد صفائی کے عمل کو مکمل کرنے کے لیے گلیوں، محلوں اور اہم شاہراہوں کو عرقِ گلاب سے دھونے کا عمل بھی جاری ہے، تاکہ علاقے میں تعفن نہ پھیلے اور شہریوں کو ایک صاف ستھرا ماحول فراہم کیا جا سکے۔
