واشنگٹن (ویب ڈیسک) امریکی نائب صدر جے ڈی وینس نے ایران کے ساتھ جنگ بندی میں توسیع کے معاہدے سے متعلق جاری قیاس آرائیوں پر وضاحت دیتے ہوئے کہا ہے کہ تاحال کسی حتمی معاہدے پر دستخط نہیں ہوئے، تاہم دونوں ممالک کسی معاہدے تک پہنچنے کے انتہائی قریب ہیں۔
ایک بیان میں جے ڈی وینس نے واضح کیا کہ صدر ڈونلڈ ٹرمپ فی الحال کسی بھی معاہدے کی باضابطہ منظوری دینے کے لیے تیار نہیں ہیں۔ انہوں نے کہا کہ یہ بتانا قبل از وقت ہوگا کہ صدر ٹرمپ اس مفاہمتی یادداشت پر کب دستخط کریں گے، کیونکہ وہ مزید پیش رفت اور ٹھوس ضمانتوں کے بعد ہی حتمی توثیق کرنے کی پوزیشن میں ہوں گے۔
نائب صدر نے اعتراف کیا کہ جنگ بندی میں توسیع کے حوالے سے مذاکرات میں کافی پیش رفت ہوئی ہے۔ انہوں نے مزید کہا کہ ایران امریکا کے ساتھ معاہدہ کرنے میں گہری دلچسپی رکھتا ہے اور اس وقت دونوں ممالک چند اہم تکنیکی نکات پر بات چیت کر رہے ہیں۔ جے ڈی وینس نے اس عزم کا اظہار کیا کہ امریکا اس پوزیشن میں ہے کہ تہران کے جوہری پروگرام کو محدود اور پیچھے دھکیل سکے۔
خیال رہے کہ اس سے قبل ایک امریکی نیوز ویب سائٹ نے یہ دعویٰ کیا تھا کہ امریکا اور ایران کے درمیان جنگ بندی میں توسیع کا معاہدہ طے پا گیا ہے، تاہم وینس کا تازہ بیان ان دعووں کی تصدیق یا تردید کے بجائے مذاکرات کے عمل کے جاری رہنے کی نشاندہی کرتا ہے۔
