اسلام آباد: نائب وزیراعظم و وزیر خارجہ اسحاق ڈار کل سرکاری دورے پر واشنگٹن ڈی سی روانہ ہوں گے۔ دفتر خارجہ کے مطابق، اسحاق ڈار نیویارک میں اپنی طے شدہ مصروفیات مکمل کرنے کے بعد واشنگٹن پہنچیں گے، جہاں ان کا اہم سفارتی ایجنڈا طے ہے۔
دورے کے دوران نائب وزیراعظم اسحاق ڈار امریکی وزیر خارجہ اور قومی سلامتی کے مشیر مارکو روبیو کے ساتھ تفصیلی ملاقاتیں کریں گے۔ ان ملاقاتوں میں پاک-امریکہ دوطرفہ تعلقات کو مستحکم بنانے، اہم شعبوں میں تعاون کو فروغ دینے اور باہمی دلچسپی کے امور پر تبادلہ خیال کیا جائے گا۔
دفتر خارجہ کے بیان کے مطابق، اس دورے میں علاقائی و عالمی صورتحال کے ساتھ ساتھ خطے میں امن و استحکام کے قیام پر بھی خصوصی گفتگو ہوگی۔ پاکستان نے اس عزم کا اعادہ کیا ہے کہ وہ مذاکرات اور سفارتکاری کے ذریعے خطے میں امن کے فروغ کے لیے پرعزم ہے۔ یہ دورہ پاکستان اور امریکہ کے دیرینہ اور تزویراتی تعلقات کو مزید مضبوط بنانے کی ایک کڑی قرار دیا جا رہا ہے۔
اپنے سرکاری دورے کی مصروفیات مکمل کرنے کے بعد نائب وزیراعظم اسحاق ڈار وطن واپس روانہ ہو جائیں گے۔
