کھاریاں (قاری نصیر احمد کلیار): کمشنر گوجرانوالہ ڈویژن محمد علی اور ڈپٹی کمشنر گجرات نور العین قریشی نے تحصیل ہیڈ کوارٹر (ٹی ایچ کیو) ہسپتال سرائے عالمگیر کا ایک اہم اور تفصیلی دورہ کیا، جہاں انہوں نے ہسپتال کے مختلف شعبہ جات کا باریک بینی سے معائنہ کیا اور زیرِ علاج مریضوں کو فراہم کی جانے والی طبی سہولیات کا جائزہ لیا۔ اس موقع پر ہسپتال کے میڈیکل سپرنٹنڈنٹ (ایم ایس) ڈاکٹر بلال بن طارق بھی ان کے ہمراہ موجود تھے جنہوں نے وفد کو ہسپتال کی کارکردگی اور انتظامی امور پر تفصیلی بریفنگ دی۔ دورے کے دوران کمشنر محمد علی اور ڈپٹی کمشنر نور العین قریشی نے مختلف وارڈز کا دورہ کر کے وہاں داخل مریضوں کی عیادت کی اور ان سے ہسپتال کی جانب سے ادویات کی مفت فراہمی کے متعلق براہِ راست دریافت کیا، جس پر مریضوں نے مکمل اطمینان کا اظہار کرتے ہوئے بتایا کہ ہسپتال انتظامیہ کی جانب سے تمام مطلوبہ ادویات بلا معاوضہ فراہم کی جا رہی ہیں۔ بعد ازاں، اعلیٰ افسران نے ہسپتال کی جدید لیبارٹری کا معائنہ کیا جہاں انہیں مریضوں کے لیے کیے جانے والے مختلف طبی ٹیسٹوں کے طریقہ کار کے حوالے سے بریفنگ دی گئی، جبکہ انہوں نے ایکس رے ڈیپارٹمنٹ کا بھی خصوصی دورہ کیا جہاں حال ہی میں نصب کردہ جدید ترین "ڈی آر سسٹم ایکسرے مشینوں” کی کارکردگی کا جائزہ لیا گیا۔ کمشنر گوجرانوالہ محمد علی نے ٹی ایچ کیو سرائے عالمگیر میں مریضوں کے لیے دستیاب اعلیٰ معیار کے طبی انتظامات، مفت ادویات کی فراہمی اور صفائی ستھرائی کے بہترین نظام کو زبردست الفاظ میں سراہتے ہوئے ایم ایس ڈاکٹر بلال بن طارق اور ان کی پوری ٹیم کی کارکردگی کی تعریف کی اور اسے دکھی انسانیت کی خدمت کی ایک بہترین مثال قرار دیا۔
