راولپنڈی (اسپورٹس ڈیسک) پاکستان کے ڈومیسٹک کرکٹر محمد فاروق نے فرسٹ کلاس کرکٹ میں شاندار اور جارحانہ بلے بازی کا مظاہرہ کرتے ہوئے ایک اننگز میں سب سے زیادہ چھکے لگانے کا تاریخی ریکارڈ اپنے نام کر لیا ہے۔ شعیب اختر اسٹیڈیم راولپنڈی میں کھیلے جا رہے پریزیڈنٹ ٹرافی فرسٹ کلاس ٹورنامنٹ کے دوسرے راؤنڈ کے میچ میں ایم آئی ٹی سلوشنز کی نمائندگی کرتے ہوئے محمد فاروق نے کے آر ایل کے خلاف 163 رنز کی دلکش اننگز کھیلی۔ ان کی اس یادگار اننگز میں 11 چوکے اور 14 فلک شگاف چھکے شامل تھے، جس نے میچ کا نقشہ ہی بدل کر رکھ دیا۔
محمد فاروق کی اس اننگز کے بعد پاکستان کے ڈومیسٹک اور عالمی فرسٹ کلاس کرکٹ میں سالہا سال پرانے ریکارڈز پاش پاش ہو گئے ہیں۔ اس سے قبل پاکستان کی ڈومیسٹک فرسٹ کلاس کرکٹ میں ایک اننگز میں سب سے زیادہ 12 چھکے لگانے کا ریکارڈ گل فراز خان کا تھا، جنہوں نے 1976-77 کے سیزن میں پاکستان یونیورسٹیز کے خلاف بنایا تھا۔ مزید برآں، محمد فاروق مجموعی طور پر کسی بھی فرسٹ کلاس میچ میں سب سے زیادہ چھکے مارنے والے پاکستانی بیٹر بھی بن گئے ہیں۔ اس سے قبل یہ اعزاز سابق مایہ ناز کرکٹر ماجد خان کے پاس تھا جنہوں نے 1967 میں کاؤنٹی کرکٹ کے دوران گلیمورگن کی جانب سے کھیلتے ہوئے ایک اننگز میں 13 چھکے لگائے تھے۔
