پاکستان کرکٹ بورڈ (پی سی بی) نے آسٹریلیا کے خلاف ہونے والی ون ڈے انٹرنیشنل سیریز کے شیڈول کا باضابطہ اعلان کر دیا ہے۔ شیڈول کے مطابق آسٹریلوی کرکٹ ٹیم تین میچوں کی سیریز کھیلنے کے لیے 23 مئی کو اسلام آباد پہنچے گی۔
سیریز کا پہلا معرکہ 30 مئی کو راولپنڈی کرکٹ اسٹیڈیم میں لڑا جائے گا، جس کے بعد دونوں ٹیمیں لاہور منتقل ہو جائیں گی۔ سیریز کے بقیہ دو میچز 2 اور 4 جون کو قذافی اسٹیڈیم لاہور میں کھیلے جائیں گے۔ شائقینِ کرکٹ کی دلچسپی کو مدنظر رکھتے ہوئے پی سی بی نے بتایا ہے کہ تمام میچز پاکستانی وقت کے مطابق شام 4 بج کر 30 منٹ پر شروع ہوں گے۔
پاکستان کرکٹ بورڈ کا کہنا ہے کہ یہ سیریز مارچ/اپریل 2022 کے بعد آسٹریلیا کی پاکستان میں پہلی ون ڈے انٹرنیشنل سیریز ہو گی۔
