امریکی اخبار نیویارک ٹائمز کی رپورٹ کے مطابق، فروری کے آخر میں شروع ہونے والی ایران جنگ نے امریکی عسکری ذخائر کو بری طرح متاثر کیا ہے۔ رپورٹ کے مطابق، امریکہ نے جنگ کے دوران اب تک 1100 سے زائد اسٹیلتھ کروز میزائل (JASSM-ER) اور 1000 سے زائد ٹوماہاک میزائل داغے ہیں، جس سے ان کے ذخائر میں نمایاں کمی واقع ہوئی ہے۔ اندازوں کے مطابق، جنگ کے پہلے دو دنوں میں ہی 5.6 ارب ڈالر مالیت کا اسلحہ استعمال کیا گیا، جبکہ اب تک اس جنگ کی مجموعی لاگت 35 ارب ڈالر تک جا پہنچی ہے جو کہ تقریباً ایک ارب ڈالر یومیہ بنتی ہے۔ امریکی محکمہ دفاع کے مطابق، 38 دنوں میں 13 ہزار سے زائد اہداف کو نشانہ بنایا گیا، جس کے نتیجے میں امریکہ کو اپنی عالمی عسکری تیاریوں کو برقرار رکھنے کے لیے ایشیا اور یورپ سے بھی ہتھیار مشرقِ وسطیٰ منتقل کرنے پڑے ہیں۔
