وزیراعظم شہباز شریف اپنے اہم سرکاری دورے کے پہلے مرحلے میں سعودی عرب پہنچ گئے ہیں، جہاں جدہ ایئرپورٹ پر نائب گورنر مکہ شہزادہ سعود بن مشعال بن عبدالعزیز اور اعلیٰ حکام نے ان کا پُرتپاک استقبال کیا۔ وزیراعظم کے ہمراہ نائب وزیراعظم اسحاق ڈار، وفاقی وزیر عطا اللہ تارڑ اور دیگر اعلیٰ حکام پر مشتمل وفد بھی موجود ہے۔ وزیراعظم آفس کے مطابق اس دورے کا سب سے اہم پہلو سعودی ولی عہد شہزادہ محمد بن سلمان سے ہونے والی دو طرفہ ملاقات ہے، جس میں دونوں ممالک کے درمیان تعلقات کے فروغ اور خطے کی مجموعی صورتحال پر تفصیلی تبادلہ خیال کیا جائے گا۔ یہ دورہ وزیراعظم کے 15 سے 18 اپریل تک جاری رہنے والے سہ فریقی دورے کا حصہ ہے، جس میں وہ سعودی عرب اور قطر کی قیادت سے ملاقاتوں کے بعد ترکیہ روانہ ہوں گے۔ ترکیہ میں وزیراعظم پانچویں ‘انطالیہ ڈپلومیسی فورم’ میں شرکت کریں گے جہاں ان کی صدر رجب طیب اردوان اور دیگر عالمی رہنماؤں سے ملاقاتیں بھی متوقع ہیں۔
