بیساکھی میلے کی سالانہ تقریبات میں شرکت کے لیے بھارت سے 2 ہزار 700 سے زائد سکھ یاتری واہگہ بارڈر کے راستے پاکستان پہنچ گئے ہیں، جہاں پاکستانی حکام کی جانب سے ان کا شاندار استقبال کیا گیا۔ متروکہ وقف املاک بورڈ اور پاکستان سکھ گوردوارہ پربندھک کمیٹی نے یاتریوں کی سہولت کے لیے واہگہ بارڈر پر لنگر، آرام دہ ٹرانسپورٹ اور فوری طبی امداد کے بہترین انتظامات کر رکھے تھے تاکہ یاتریوں کو کسی قسم کی دشواری کا سامنا نہ کرنا پڑے۔ اس موقع پر گفتگو کرتے ہوئے سکھ یاتریوں نے پاکستانیوں کی روایتی مہمان نوازی کی تعریف کی اور کہا کہ یہاں ملنے والے پیار اور احترام نے ان کے دل جیت لیے ہیں۔
وزیرِ اقلیتی امور پنجاب سردار رمیش سنگھ اروڑہ اور پردھان پاکستان سکھ گوردوارہ پربندھک کمیٹی نے یاتریوں کا استقبال کرتے ہوئے پیغام دیا کہ پاکستان ایک امن پسند ملک ہے اور یہاں سکھوں سمیت تمام اقلیتوں کے لیے دروازے ہمیشہ کھلے ہیں۔ طے شدہ شیڈول کے مطابق سکھ یاتری سب سے پہلے ننکانہ صاحب میں قیام کریں گے، جس کے بعد وہ گوردوارہ پنجہ صاحب حسن ابدال روانہ ہوں گے جہاں 14 اپریل کو بیساکھی میلے کی مرکزی اور بڑی تقریب منعقد کی جائے گی۔ اپنی یاترا کے اگلے مراحل میں یاتری گوردوارہ دربار صاحب کرتار پور اور گوردوارہ ڈیرہ صاحب لاہور کی زیارت بھی کریں گے اور مذہبی رسومات کی ادائیگی کے بعد تمام سکھ یاتری 19 اپریل کو واپس بھارت روانہ ہو جائیں گے۔
