کھاریاں ( قاری نصیر احمد کلیار) کھاریاں کی مصروف ترین نیک عالم مارکیٹ میں نصب بجلی کا ٹرانسفارمر شہریوں اور تاجروں کے لیے ایک سنگین خطرہ بن چکا ہے۔ مارکیٹ کے تاجران اور مقامی رہائشیوں نے تشویش کا اظہار کرتے ہوئے بتایا ہے کہ ٹرانسفارمر کی خستہ حالی اور لٹکتی ہوئی تاریں کسی بھی وقت جانی یا مالی نقصان کا سبب بن سکتی ہیں۔ یہ ٹرانسفارمر ایسے مقام پر موجود ہے جہاں سے روزانہ سینکڑوں خریداروں اور راہگیروں کا گزر ہوتا ہے، جس کی وجہ سے ہر وقت حادثے کا خدشہ رہتا ہے۔
علاقہ مکینوں کے مطابق متعلقہ حکام کو صورتحال سے آگاہ کیے جانے کے باوجود اب تک کوئی حفاظتی اقدامات نہیں کیے گئے۔ تاجروں نے مطالبہ کیا ہے کہ عوامی تحفظ کے پیشِ نظر اس خطرناک ٹرانسفارمر کی فوری مرمت کی جائے یا اسے کسی محفوظ جگہ منتقل کیا جائے۔ انہوں نے واپڈا کے اعلیٰ حکام اور ایکسین کھاریاں سے اپیل کی ہے کہ وہ انسانی جانوں کے تحفظ کو یقینی بنانے کے لیے اس مسئلے کا فوری نوٹس لیں۔
