ایران کو ایک ہی رات میں ختم کیا جا سکتا ہے اور وہ رات منگل کی رات بھی ہو سکتی ہے: ڈونلڈ ٹرمپ

امریکی صدر ڈونلڈ ٹرمپ نے واشنگٹن میں پریس کانفرنس کے دوران ایران کے حوالے سے سخت اور دھمکی آمیز بیانات دیتے ہوئے کہا ہے کہ ایران کو ایک ہی رات میں ختم کیا جا سکتا ہے اور وہ رات منگل کی رات بھی ہو سکتی ہے۔ ان کے اس بیان نے خطے میں بڑھتی ہوئی کشیدگی میں مزید اضافہ کر دیا ہے۔

ٹرمپ نے دعویٰ کیا کہ امریکا نے حال ہی میں ایک بڑا اور اہم ریسکیو مشن کامیابی سے مکمل کیا، جس میں ایک پائلٹ کو ایران سے دن کی روشنی میں بحفاظت نکالا گیا۔ انہوں نے کہا کہ اس مشن کے دوران امریکی فوجیوں کو قریب سے فائرنگ کا سامنا بھی کرنا پڑا، تاہم تمام اہلکار محفوظ رہے۔

امریکی صدر کے مطابق پہلے ریسکیو آپریشن میں 21 لڑاکا طیاروں نے حصہ لیا جبکہ دوسرے آپریشن میں مجموعی طور پر 155 طیارے شامل تھے، جن میں بمبار طیارے، فائٹر جیٹس، ری فیولنگ ٹینکرز اور ریسکیو ایئرکرافٹ شامل تھے۔ انہوں نے بتایا کہ اس مشن کے دوران جدید ہیلی کاپٹرز بھی استعمال کیے گئے جن کی کارکردگی انتہائی مؤثر رہی۔

ٹرمپ کا کہنا تھا کہ یہ آپریشن ان کے احکامات پر کیا گیا اور اسے کامیابی سے مکمل کیا گیا، جس میں کوئی جانی نقصان نہیں ہوا۔ تجزیہ کاروں کے مطابق ایسے بیانات خطے میں مزید کشیدگی کو جنم دے سکتے ہیں۔