اسلام آباد میں ۱۹۰ ملین پاؤنڈ کیس کے حوالے سے اہم پیش رفت سامنے آئی ہے۔ ذرائع کے مطابق اسلام آباد ہائیکورٹ کے چیف جسٹس آفس نے سابق وزیرِاعظم عمران خان کی سزا معطلی کی متفرق درخواست سماعت کے لیے مقرر کرنے کی یقین دہانی کرا دی ہے۔
پاکستان تحریکِ انصاف کے وکلا سلمان اکرم راجہ اور سلمان صفدر نے سیکرٹری ٹو چیف جسٹس سے ملاقات کی، جس میں کیس کی سماعت سے متعلق امور پر تبادلہ خیال کیا گیا۔ ملاقات کے بعد غیر رسمی گفتگو میں سلمان صفدر کا کہنا تھا کہ سزا معطلی کی درخواست کو جلد سماعت کے لیے مقرر کیے جانے کی یقین دہانی کرائی گئی ہے۔
اس سے قبل سلمان اکرم راجہ نے اسلام آباد ہائیکورٹ کے باہر میڈیا سے گفتگو کرتے ہوئے مؤقف اختیار کیا تھا کہ درخواستیں دائر ہونے کے باوجود ان پر سماعت نہیں ہو رہی، تاہم اب عدالتی کارروائی میں پیش رفت کی امید پیدا ہوئی ہے۔
ذرائع کا کہنا ہے کہ ۱۹۰ ملین پاؤنڈ کیس کو جلد سماعت کے لیے مقرر کرنے کی درخواست کل باقاعدہ طور پر لسٹ کیے جانے کا امکان ہے۔ آئندہ سماعت کی تاریخ سامنے آنے کے بعد کیس کی قانونی سمت مزید واضح ہو جائے گی۔
