پاکستان سپر لیگ کے 11ویں ایڈیشن میں شامل نئی فرنچائز راولپنڈی نے اپنی ٹیم کے نام کا باضابطہ اعلان کر دیا ہے۔ اتوار کے روز فرنچائز کی جانب سے ٹیم کا نام ’Pindiz‘ رکھنے کا اعلان کیا گیا۔
یاد رہے کہ پی ایس ایل کی ٹیم ملتان سلطانز کی نیلامی میں ولی ٹیک نے 2 ارب 45 کروڑ روپے میں فرنچائز خریدی تھی، تاہم نئے مالکان نے ٹیم کا نام ملتان سے تبدیل کر کے راولپنڈی رکھ دیا تھا۔
ٹیم کے نام کا اعلان سوشل میڈیا پر جاری کی گئی 25 سیکنڈ کی ایک ویڈیو کے ذریعے کیا گیا، جس میں راولپنڈی شہر کے نمایاں مقامات دکھائے گئے اور پس منظر میں جوشیلی موسیقی شامل تھی۔ ویڈیو کے کیپشن میں کہا گیا کہ راولپنڈی ٹیم کا باضابطہ نام ’Pindiz‘ سامنے آ گیا ہے۔ ہم نڈر ہیں، ہم چیلنج دینے آئے ہیں، ہم نیا جوش لے کر آ رہے ہیں اور ہم کھیل کو بدلنے آ رہے ہیں۔ فرنچائز نے جلد ہی ٹیم کا لوگو متعارف کرانے کا اعلان بھی کیا ہے۔
واضح رہے کہ ملتان سلطانز کے سابق مالک علی ترین نے 10 سالہ ملکیت کے معاہدے کی تجدید سے انکار کیا تھا، جس کے بعد پی سی بی نے فرنچائز کی نیلامی کا اعلان کیا تھا۔ پاکستان سپر لیگ کا 11واں ایڈیشن 26 مارچ سے 3 مئی تک کھیلا جائے گا، جس کا شائقین کو بے صبری سے انتظار ہے۔
