وزیراعظم شہباز شریف نے کہا ہے کہ پاکستان مشکل معاشی حالات سے نکل چکا ہے اور اب ملک میں اقتصادی استحکام آ رہا ہے۔ ورلڈ اکنامک فورم کے اجلاس کے موقع پر پاکستان پویلین میں منعقدہ پاکستان بریک فاسٹ سے خطاب کرتے ہوئے انہوں نے بتایا کہ معدنیات کے شعبے میں نمایاں سرمایہ کاری ہو رہی ہے جبکہ آئی ٹی اور دیگر برآمدات میں بھی حوصلہ افزا اضافہ دیکھنے میں آیا ہے۔
وزیراعظم کے مطابق حکومت آئی ٹی برآمدات کو مزید بڑھانے کے لیے تیزی سے اقدامات کر رہی ہے۔ انہوں نے کہا کہ یہ کامیابیاں مضبوط ٹیم ورک کا نتیجہ ہیں، جس میں سیاسی اور عسکری قیادت کے درمیان مکمل ہم آہنگی شامل ہے۔
شہباز شریف نے نوجوانوں کو ہنرمند بنانے کے لیے مختلف تربیتی پروگرامز کا ذکر کرتے ہوئے کہا کہ پاکستانی نوجوانوں کو خلیجی ممالک اور دنیا کے دیگر حصوں میں روزگار کے مواقع کے لیے تیار کیا جا رہا ہے۔ اس کے علاوہ انہوں نے انسدادِ دہشت گردی کے شعبے میں عالمی تعاون جاری رکھنے کے عزم کا بھی اعادہ کیا۔
اس موقع سے قبل وزیراعظم نے عالمی مالیاتی فنڈ کی منیجنگ ڈائریکٹر کرسٹالینا جارجیوا سے ملاقات کی، جہاں انہیں پاکستان کے بہتر ہوتے ہوئے میکرو اکنامک اشاریوں سے آگاہ کیا گیا۔ آئی ایم ایف کی سربراہ نے پاکستان کی معاشی اصلاحات کی کوششوں کو سراہا۔
