بلوچستان میں ریلوے نظام کی بہتری کے لیے ایک اہم منصوبے پر کام رواں سال اپریل میں شروع ہونے جا رہا ہے۔ اس منصوبے کے تحت ضلع چاغی کے علاقے نوکنڈی سے سبی تک تقریباً 600 کلومیٹر طویل ریلوے ٹریک کو اپ گریڈ کیا جائے گا، جس سے خطے میں سفری اور تجارتی سہولیات میں نمایاں بہتری آئے گی۔ذرائع کے مطابق اس منصوبے پر مجموعی طور پر 400 ملین ڈالر لاگت آئے گی، جبکہ اسے تین سال کی مدت میں مکمل کرنے کا ہدف مقرر کیا گیا ہے۔ ریلوے ٹریک کی اپ گریڈیشن کے بعد ٹرینوں کی رفتار، سیکیورٹی اور مسافروں کے لیے سہولیات میں اضافہ ہوگا۔حکام کا کہنا ہے کہ اس منصوبے سے بلوچستان کے دور دراز علاقوں کو ملک کے دیگر حصوں سے بہتر انداز میں جوڑنے میں مدد ملے گی، جس سے معاشی سرگرمیوں کو فروغ اور عوام کو سفری سہولت فراہم کی جا سکے گی۔
