گوجرانوالہ میں ماس ٹرانزٹ منصوبے کی افتتاحی تقریب سے خطاب کرتے ہوئے وزیراعظم شہباز شریف نے کہا کہ نواز شریف کا سب سے بڑا کارنامہ ملک کو ایٹمی قوت بنانا ہے، اگر پاکستان ایٹمی طاقت نہ ہوتا تو اس سال جنگ کے دوران حالات بہت مختلف ہوسکتے تھے۔
وزیراعظم نے کہا کہ پورے ملک میں مسلم لیگ (ن) کا نعرہ بلند ہوگا۔ نواز شریف نے بطور وزیراعلیٰ اور وزیراعظم جو ترقیاتی کام کیے، تاریخ ہمیشہ یاد رکھے گی۔ پنجاب میں تعمیراتی سیاست کا آغاز نواز شریف نے کیا، جنہوں نے عوامی ضروریات کے مطابق بڑے منصوبے مکمل کیے۔
انہوں نے کہا کہ وزیراعلیٰ مریم نواز نے گوجرانوالہ کے لیے جو ماس ٹرانزٹ منصوبہ تحفے میں دیا ہے، یہ پورے ضلع کی تقدیر بدل دے گا۔ اس منصوبے سے طلبہ وقت پر اسکول پہنچیں گے، مزدور کارخانوں میں، وکلا عدالتوں میں، اور شہری زندگی کے ہر شعبے سے تعلق رکھنے والوں کو آسانی ہوگی۔
شہباز شریف نے کہا کہ لاہور کبھی دنیا کے آلودہ ترین شہروں میں شمار ہوتا تھا، لیکن اسموگ میں کمی لانے کے لیے وزیراعلیٰ مریم نواز اور ان کی ٹیم نے عملی اقدامات کیے جن کے نتائج آج سب کے سامنے ہیں۔ یہ کام کوئی چاہے بھی تو چھپا نہیں سکتا، مخالفین کو بھی اس کا اعتراف کرنا پڑتا ہے۔
