وزیرِاعلیٰ پنجاب کی خصوصی ہدایات پر منڈی بہاءالدین پولیس کی جانب سے تعلیمی اداروں میں ٹریفک آگاہی سیشن منعقد کیا گیا، جس کا مقصد طلباء و طالبات کو سڑکوں پر درپیش خطرات، ٹریفک قوانین کی پابندی اور محفوظ سفر کی اہمیت سے آگاہ کرنا تھا۔
سیشن کے دوران پولیس افسران نے طلباء کو بتایا کہ موٹر سائیکل چلانے والوں کے لیے ہیلمٹ کا استعمال نہایت ضروری ہے، تاکہ حادثات کی صورت میں جان لیوا چوٹوں سے بچا جا سکے۔ اس کے ساتھ ساتھ حدِ رفتار کی پابندی، خاص طور پر اسکول اور کالج کے اطراف، طلباء اور شہریوں کی حفاظت کے لیے ناگزیر ہے۔
پولیس نے ون وے کی خلاف ورزی کو سنگین خطرہ قرار دیا اور طلباء کو ہدایت کی کہ ہمیشہ ٹریفک کے بہاؤ کی صحیح سمت میں سفر کیا کریں۔
افسران نے کہا کہ ٹریفک قوانین کی پاسداری نہ صرف اپنی بلکہ اپنے اہلِ خانہ کی حفاظت بھی یقینی بناتی ہے، اور آج کے نوجوان ہی کل کے ذمہ دار شہری ہیں۔
آخر میں پولیس نے شہریوں سے اپیل کی کہ ٹریفک اصولوں پر عمل کر کے منڈی بہاءالدین کی سڑکوں کو محفوظ بنانے میں اپنا کردار ادا کریں، تاکہ حادثات اور جانی نقصان سے بچا جا سکے۔
