پنجاب: سینئر وزیر مریم اورنگزیب نے پنجاب کے ضمنی انتخابات میں مسلم لیگ ن کی شاندار کامیابی پر خوشی کا اظہار کرتے ہوئے کہا کہ الحمدللہ شیر کامیاب ہوگیا۔
مریم اورنگزیب نے سوشل میڈیا پر اپنے بیان میں نواز شریف، شہباز شریف اور مریم نواز کی ویڈیو بھی شیئر کی، جس میں پارٹی کی کامیابی پر خوشی اور حوصلہ بڑھانے کی کوشش کی گئی۔
غیر حتمی اور غیر سرکاری نتائج کے مطابق لاہور کے حلقہ این اے 129 میں مسلم لیگ ن کے حافظ نعمان نے 63 ہزار 441 ووٹ لے کر جیت حاصل کی۔ این اے 143 ساہیوال 3 کے غیر حتمی نتائج میں مسلم لیگ ن کے محمد طفیل جٹ نے ایک لاکھ چھتیس ہزار دو سو تیئس ووٹ لے کر کامیابی حاصل کی۔
ڈیرہ غازی خان کے حلقہ این اے 185 میں زرتاج گل کی نااہلی کے بعد ہونے والی ضمنی انتخابی مقابلے میں مسلم لیگ ن کے محمود قادر خان نے 82 ہزار 413 ووٹ لے کر میدان مار لیا۔
پنجاب اسمبلی کے حلقہ پی پی 203 ساہیوال سے بھی مسلم لیگ ن کے محمد حنیف نے 46 ہزار 900 ووٹ لے کر کامیابی حاصل کی جبکہ فیصل آباد کے حلقہ پی پی 115 سے محمد طاہر پرویز 49 ہزار 46 ووٹ لے کر فاتح قرار پائے۔
یہ نتائج واضح کرتے ہیں کہ پنجاب میں مسلم لیگ ن ضمنی انتخابات میں کلین سوئپ کی جانب رواں دواں ہے اور تحریک انصاف کی چھوڑی ہوئی تمام نشستوں پر ن لیگ کے امیدوار برتری حاصل کر چکے ہیں۔
