محکمہ داخلہ پنجاب کی جانب سے جاری کردہ نوٹیفکیشن کے مطابق، پنجاب میں دفعہ 144 کے تحت نافذ کی جانے والی پابندیوں میں 7 دن کی توسیع کر دی گئی ہے۔ اب یہ پابندیاں 15 نومبر تک برقرار رہیں گی۔ اس نوٹیفکیشن میں کہا گیا ہے کہ اس دوران ہر قسم کے احتجاج، جلسے، جلوس، ریلیوں، دھرنوں، اجتماعات اور دیگر ایسی سرگرمیاں جن میں عوامی اجتماع ہو، ان پر مکمل پابندی عائد رہے گی۔
نوٹیفکیشن میں مزید بتایا گیا کہ عوامی مقامات پر 4 یا اس سے زائد افراد کے جمع ہونے، اسلحہ کی نمائش، لاؤڈ اسپیکر کا استعمال، اشتعال انگیز، نفرت آمیز یا فرقہ وارانہ مواد کی اشاعت اور تقسیم پر سخت پابندیاں عائد کی جائیں گی۔ تاہم، اس پابندی کا اطلاق شادی بیاہ کی تقریبات، جنازہ اور تدفین کی محافل پر نہیں ہوگا۔
دوسری جانب، سرکاری فرائض کی انجام دہی پر مامور افسران، اہلکار، اور عدالتوں کو اس پابندی سے مستثنیٰ قرار دیا گیا ہے۔ اس کے علاوہ، لاؤڈ اسپیکر صرف اذان اور خطبہ جمعہ کے لیے استعمال کیا جا سکے گا۔
پابندیوں کے اس نفاذ کا مقصد صوبے میں امن و امان کی صورتحال کو برقرار رکھنا اور کسی بھی غیر ضروری ہلچل سے بچنا ہے۔
