ڈارون (اسپورٹس ڈیسک)جنوبی افریقہ نے آسٹریلیا کو دوسرے ٹی ٹوئنٹی انٹرنیشنل میں 53 رنز سے شکست دے کر تین میچز کی سیریز 1-1 سے برابر کر دی ہے۔میچ میں ڈیوالڈ بریوس کی شاندار اور برق رفتار سنچری نے جنوبی افریقہ کی فتح میں مرکزی کردار ادا کیا۔
بریوس کا طوفانی بلّا
جنوبی افریقہ نے پہلے بیٹنگ کرتے ہوئے 7 وکٹوں پر 218 رنز بنائے۔ آغاز میں ٹیم کو مشکلات کا سامنا رہا اور 57 رنز پر 3 کھلاڑی پویلین لوٹ گئے۔ مگر اس کے بعد ڈیوالڈ بریوس نے میدان سنبھالا اور صرف 41 گیندوں پر سنچری مکمل کی۔
انہوں نے مجموعی طور پر 56 گیندوں پر ناقابلِ شکست 125 رنز کی اننگز کھیلی، جس میں چھکے اور چوکوں کی بارش نظر آئی۔ٹرسٹان اسٹبز نے 31 رنز کا اضافہ کیا، جس نے بریوس کے ساتھ شراکت کو مضبوط کیا اور ٹیم کا مجموعہ 218 رنز تک پہنچا دیا۔
آسٹریلوی بیٹنگ لڑکھڑا گئی
ہدف کے تعاقب میں آسٹریلوی بیٹنگ لائن لڑکھڑا گئی۔ اگرچہ ٹم ڈیوڈ نے 24 گیندوں پر 50 رنز کی برق رفتار اننگز کھیلی، لیکن وہ ٹیم کو فتح کی پٹری پر واپس نہ لا سکے۔مکمل ٹیم اٹھارہویں اوور میں 165 رنز پر ڈھیر ہو گئی۔
میفاکا اور بوش کا کمال
جنوبی افریقہ کی جانب سے کینوا میفاکا اور کاربن بوش نے شاندار باؤلنگ کا مظاہرہ کرتے ہوئے 3، 3 وکٹیں حاصل کیں اور آسٹریلیا کو میچ سے باہر کر دیا۔
فیصلہ کن مقابلہ ہفتے کو
جنوبی افریقہ نے یہ میچ جیت کر سیریز کو 1-1 سے برابر کر دیا ہے۔اب سیریز کا فیصلہ کن اور تیسرا ٹی ٹوئنٹی میچ ہفتے کے روز کھیلا جائے گا، جس میں دونوں ٹیمیں سیریز جیتنے کے لیے میدان میں اتریں گی۔
