وزیراعظم شہباز شریف سے ایران کے صدر مسعود پزشکیان کی نیویارک میں اقوام متحدہ جنرل اسمبلی کے اکیاسی ویں اجلاس کے موقع پر اہم ملاقات ہوئی، جس میں پاک ایران تعلقات، خطے کی صورتِ حال اور دیگر اہم امور پر تفصیلی بات چیت کی گئی۔ اس ملاقات میں نائب وزیراعظم و وزیرِ خارجہ اسحاق ڈار، وزیر دفاع خواجہ محمد آصف اور معاون خصوصی طارق فاطمی سمیت ایرانی وزیر خارجہ عباس عراقچی بھی شریک تھے۔ وزیر اعظم آفس کے اعلامیے کے مطابق دونوں رہنماؤں نے پاکستان اور ایران کے درمیان قریبی اور دیرینہ تعلقات کا اعادہ کرتے ہوئے دوطرفہ تعاون کو مزید مستحکم بنانے کی ضرورت پر زور دیا اور علاقائی امن و خوشحالی کے فروغ کے لیے مل کر کام کرنے پر اتفاق کیا۔
ملاقات کے دوران وزیراعظم شہباز شریف نے طویل عرصے سے جاری تنازع پر گہری تشویش کا اظہار کرتے ہوئے خطے میں امن کے لیے تحمل اور سفارتی رابطوں کی اہمیت پر زور دیا، جبکہ اسلام آباد ایم او یو کے تحت مفاہمت پر عملدرآمد جاری رکھنے کی ضرورت کو بھی اجاگر کیا۔ وزیراعظم نے میڈیا سے گفتگو میں کہا کہ ایران، اس کے ہمسایہ ممالک اور امریکا کے درمیان پاکستان ایک مخلص اور دیانت دار ثالث کا کردار ادا کر رہا ہے تاکہ کشیدگی کو بڑھنے سے روکا جا سکے۔ ایرانی صدر مسعود پزشکیان نے علاقائی امن و سلامتی کے لیے پاکستان کی کوششوں کو سراہا اور دونوں برادر ممالک کے تعلقات کی مضبوطی کے ساتھ تعاون کے فروغ کے لیے ایران کی پرخلوص خواہش کا اعادہ کیا۔
