پاکستان کے معروف ترین فلاحی ادارے "ایدھی فاؤنڈیشن” کے سربراہ فیصل ایدھی کے بیٹے سعد ایدھی غزہ کے مظلوم بہن بھائیوں کے لیے ایک بڑے امدادی مشن کا حصہ بن گئے ہیں۔ وہ ترکیہ کے شہر مارمارس (Marmaris) سے بین الاقوامی امدادی جہازوں کے بیڑے ‘فریڈم فلوٹیلا’ کے ہمراہ غزہ کے لیے روانہ ہو چکے ہیں۔ اپنے ایک خصوصی ویڈیو پیغام میں سعد ایدھی نے بتایا کہ اس "گلوبل صمود فلوٹیلا” میں دنیا کے مختلف ممالک سے تعلق رکھنے والے 500 سے زائد انسانی حقوق اور فلاحی کارکنان شریک ہیں، اور اس اہم انسانی مشن کے اگلے 6 سے 7 روز میں مکمل ہونے کی امید ہے۔
سعد ایدھی کا مزید کہنا تھا کہ گلوبل صمود فلوٹیلا اور ایدھی فاؤنڈیشن کا واحد مقصد غزہ کے جنگ زدہ اور محصور متاثرین تک ادویات، خوراک اور دیگر ضروری انسانی امداد پہنچانا ہے۔ واضح رہے کہ یہ مشن انتہائی پرخطر ہے کیونکہ گزشتہ ماہ بھی اسرائیلی بحریہ نے غزہ کے لیے امداد لے جانے والے صمود فلوٹیلا کو زبردستی روک کر اس میں سوار امدادی کارکنوں کو حراست میں لے لیا تھا۔ منتظمین کے مطابق، پچھلی بار اسرائیلی فوج نے جدید ڈرونز، کمیونیکیشن جیمنگ ٹیکنالوجی (مواصلاتی نظام معطل کرنے والے آلات) اور بھاری مسلح اہلکاروں کے ذریعے بحیرہِ روم کے وسط میں فلوٹیلا کا راستہ روکنے کے لیے جارحانہ کارروائی کی تھی، تاہم اس بار بھی بین الاقوامی کارکنان تمام تر خطرات کے باوجود غزہ میں محصور انسانوں کی مدد کے لیے پرعزم ہیں۔
